تلاعبنى صلح الاعبك شلح

حينما تجد أن 60 مليون مدونه عربيه



كلها تقريبا تتحدث عن قصور



فى أداء الانظمه الحاكمه



ولا تخلوا من انتقادات للاجهزة الامنية



باعتبارهم عصا الحكام التى تربى الشعوب وتزرع



فيهم الخوف والرهبة من مجرد المساس



باسم الحاكم وتأصيل فكرة انه ظل الله فى الارض



حينما ترى ذلك الاجماع فلا بد ان تحكم بفساد العصر



وفساد الشعوب التى تؤرق حكامها



فهى لا تسكت فتريح و لاتثور فتستريح



يعنى زى اللى رقصت على السلم –



والتجربه والتاريخ يثبت ان الشعوب العربيه



مدمنه فساد فهى شعوب لا تتذوق طعم القفا الاول



ولعبة صلح اصبحت إدمان وهى لعبه



نلعبها على الشواطىء وفى المتنزهات العامه



ايام ماكان فيه نفس للتنزه …..



يقف خلفك عدة اشخاص ثم يتطوع واحدا منهم



ويقوم لاهفك كف ابن لاذينه وتستدير وانت تترنح



وعليك ان تجيب عن السؤال الهام



يا ترى مين اللى ضرب



غير ان اللعبه تصبح اكثر صعوبه



حين يكون خلفك واحد فقط



ويكون الضرب على القفا …………



ويلهفك القفا عنيك تطلع



شرار وتستدير لتجده يبتسم



رافعا حاجبيه وقد وضع يده لامسا اذنه اليمنى



ليسمعك وانت تجيب على سؤاله



مين اللى ضرباااااااك!!!!!!



لوشاطر تقول



وتسقط فى الحيص بيص معقول مش هوه؟



وتستبعد الفكره فورا…………



ليه بقه ؟لانه مٌقنع ولأنه صريح للغايه



وكل مره يقولك إن ايامنا اللى جايه سودا



وفعلا تلاقيها سوده… فانت تعهد فيه الصراحه



وتحتار ياترى مين ؟!!!!!! وتقفز فى ذهنك



إجابات تم برمجتك على استرجاعها وقت الزنقه ….



اسرائيل؟ لا لا لازم امريكا …



الله طب ماهو يمّكن الارهاب…



بس برضه فيه الزياده السكانيه……….



ولا يمّكن بيتهيألى!!!!!



مع ان صوابعه لسه معلمه على قفاك



ومحدش وراك غيره .



ولاتستطيع ان تصدق !! يانهار اسود



وتتوالى القفيان ولا يشغلن بالك إلا السؤال الهام



والعبقرى .. مين اللى بيضرب…!!!!!!





وبعد القفا رقم ألف تكون اتعودت واصبحت مدمنا



بل وربما تقوم بمظاهرة مليونيه



مطالبا بحقك فى التموين اليومى



فبدون تلك الاقفية لن تشعر بانك تعيش فى بلادك



وطبعا الاحساس بالغربه صعب اصعب من الموت



وهذا لا يرضى حكامك فلا تتأخر تواتر الاقفيه



والله شعب لذيذ وأى حاكم فى الدنيا يتمناه



بس نصيحه للى بيلعب صلح لو كنت مفترى



وجاءعليك الدور والملايين دى كله وراك



يااااااالهوىىىىىىى حتنور والنعمه



سيتجرأون ويفقسون اللعبه



ساعتها حتتغير اللعبه من صلح الى شلح



انهم يفكرون الان



وبدل الضرب حتبقى حاجه تانيه



والبواسير بقى والبروستاتا



يا خراشىىىىىىىىىىى

وما العمل

دي بقت مصيبة

"إن الله لا يغير ما بقوم حتى يغيروا ما بأنفسهم"

الحل في كل واحد منا

الحل فيك أنت ,أنت وحدك

لا تنتظر حلا ينزل عليك من السماء

كن إيجابي وقل بكل قوة مش لاعب

لن أنتظر القفا التالي

مش لاعب

ولا صلح ولا شلح
الله كريم
والفرج قريب بإذن الله