وبعدين معاكم

موضوع: وبعدين معاكم الأحد أغسطس 08, 2010 5:22 pm

( اسفه لعدم تمكني من تنزيل الصور من الادراج الاصلي لصعوبة ذلك هنا )

وبعدين معاكم

بانجو انتوا تاني ؟

حشيش فايدة فيكوا؟

طاااااااااايب بودرة تشوفوا

الكلام ده كان نكتة لواحد عامل دماغ بس في مناهج دراسية منتهيه ( يعني قديمه ) ههههههههههههههه

بس تفتكروا انا بقولها ليه بقاااااااا؟ وإيه علاقتها بإدراجي الجديد؟ بتخمنوا؟ طبعا مش هيبقى عندكم صبر علشان تخمنوا وهتقروا الكلام الجاي علي طول علشان تعرفوا بفضولكم ايه السبب. عموما حتى لو ذكاءكم خارق مش هتعرفوا عارفين ليه؟لإن المعنى في بطن الشاعر هههههههههه

ولما تعرفوا السبب اللي قلتها علشانه هتتصدموا

بس أنا بقولها ليه بقااااااااااااا؟ وإيه علاقتها بإدراجي الجديد؟ طبعا مالهاش آااااااااااااااااي علاقة بإدراجي كل الحكاية إن أنا كنت عاوزه أقولكم وبعدين معاكم في موضوع كده فإفتكرتها فرحت كتباها ههههههههههههههه

رزالة وتباتة وقلة أدب صح؟

حرقتلكوا دمكوا صح؟

ويمكن تكونوا ضحكتوا شويه

عموما لو كنت حرقتلكوا دمكوا مش هيبقى زي دمي المحروق وقهرة قلبي في الموضوع اللي جاية أقولهولكوا

ولو كنتم ضحكتوا فيبقى كويس قبل ما ندخلوا في الجد والنكد

عموما ما تقلقوش خاااااااااالص لسانا قاعدين مع بعض شويه كمان نهزروا قبل ما ندخلوا في الجد والإكتئاب واللذي منه وتقولوا ييييييييييييييه وتفضوا القعدة

المهم كنت عاوزه اقولكوا وبعدين معاكم ليه بقا اللي جابت التباته دي كلها ؟ قبل ما انسى يعني وبعدين هنرجعوا نهزروا تاني اوعدكم بكده هههههههههههههه

علشان انتوا لسه بتشربوا في دم اخوانكم وبتكلوا في لحمهم. ما تستغربوش مش انتم بردوا لسه بتشربوا البيبسي والكولا والمشروبات إياها وبتكلوا من مطاعم التيك اواي اللي معظمها امريكاني واسرائيلي أو بالشراكة مع حد منهم ؟ يبقى بتشربوا في دم الفلسطينيين وتكلوا في لحمهم وكذلك كل بلد عربيه بيعتدى عليها

طبعا هتقولوا إحنا مش قادرين نبطلوا البيبسي والكولا لأن طعمهم لذيذ وخصوصا مع الاكل وفيكم اللي هيقول مصر والبلاد العربيه ما بتنتجش حاجه بديلة تعوضنا عنهم وفيكم اللي هيقول طب إعرف إزاي إن المنتج الفلاني مصري أو أمريكي او اسرائيلي هقوله يا سابق سنك تعرف ان المنتج مصري لو لقيت طعمه وحش هههههههه والصودا فيه مش بتلسع زي البيبسي والكولا بس مش مهم إغصب علي نفسك وإشربه هتاخد علي طعمه وقدر نفسك انك في حالة حرب أو موجود في الصحرا وما فيش قدامك غيره هتلاقيه زي العسل ههههههههههههه

ما تقرا ياخويا وتشوف اسم البلد او الشركه هي شركاتهم ما شاء الله ليها صيت جااااااااااااااامد اوي ومعروفه حتى لو بالشراكه مع حد مافيش عند امه دم يكون عربي او مصري ( عميل يعني)

وفيكم اللي هيقول بس دي كنتاكي منزله حتة ديك صاندوتش اسمه توستيد تويستر إنما إييييييييييييييه يجنن.

والا البيج فيلر وااااااااااااااو . لا لا لا والا الهاليبينو ده حكاية بيقولك مكون من إيه ده يا سيدي 4 قطع من الكرسبي ستربس بخلطة زنجر الحارة وفلفل الهاليبينو الحار والخس الطازج جدا جدا وصوص مايونيز دجاج كنتاكي المخصوص اللي ما تلاقيهوش في اي حتة تانيه )

وتعالالي لهارديز بقا ابن اللذينه منزل الصاندوتش اللي اسمه فريسكو وده عبارة عن إيه (هامبرجر مشوي بطريقة بنت كلب وشرائح الطماطم + شريحة من الجبن السويسري والمايونيز وكووووووووول ده جوه الخبز اللي اسمه الفريسكو المخصوص اللي مش هتلاقيه غير عند هارديز ابن اللذينه)

واللا صاندوتشات ماكدونالدز ابن ستين كلب في بعض

واللا بيتزا هت اللي مش بقبلها ولا بطيق طعمها بصراحة

طبعا انتم بتقولوا البت دي مجنونه وألاّ إيه ههههههههه هي جاية تعمل دعاية للاكلات اللذيذة بتاعت كنتاكي وماكدونالدز وهارديز وبيتزا هت وجايه تجري ريقنا وتفكرنا علشان علي طول نرفعوا سماعة التليفون ونطلبوا اكل الاصناف اللذيذة دي؟ آل وعامله نفسها قلبها علي العرب وبتقول قاطعوا منتجات الامريكان والاسرائيليين قتلة الاطفال اللي ربنا ياخدهم

عموما انا لسه هجري ريقكم اكتر بالذات لما تعرفوا ان كل قرش بيتصرف علي الوجبات دي أو أي منتج سواء مأكل أو مشرب أو ملبس بيساهم ولو بجزء صغير جدا في قنبلة او صاروخ أو سلاح بيضرب في وجه الفلسطينين وإحنا من بعدهم انشاء الله نتيجة سوءات ما نفعله وندفعه بإيدينا ليهم.

وإوعوا تقولوا ان انتم مش عارفين ان القنابل الفسفوريه اللي كانوا بيضربوا بيها دي مش بتفرتك الواحد والمكان 100 حته وحتي اللي نفد ولسه عايش وناقص إيد أو رجل او الاتنين كل لما الجرح بتاعه بيشم الاكسجين او الهوا العادي ما بينشطش تاني ويفضل يسيح في جسمه لآخر يوم في عمره. أوعوا تقولوا ان انتم مش عارفين كده

هاه نفسكوا اتفتحت اكتر والريق جرى اكتر والا لسه؟

أكيد في منكم اللي هيقول ده ماله ومال ده لأماله وماله وماله لأن انتعاش اقتصادهم اللي بفلوسنا إحنا( لأن احنا العرب اكتر ناس بتاكل وبتلبس من عندهم ) ده بيديهم فرصه كبيره للصرف علي الاسلحة وطبعا تمويل اسرائيل في المركز الاول بييجي من امريكا غير منتجاتهم بردوا اللي احنا بنشتروها

وما تقوليش ماهو دمار اقتصاد امريكا هيعود علينا هقولك حتى لو كان فعلا فأحسن . هتقولوا هبلة هقوللكم إن احنا لو صممنا واتحدنا كووووووولنا كأفراد وشعوب وبلاد عربيه علي المقاطعة بجدية هنرغموا مستثمرينا واصحاب رؤوس الاموال انهم بدل ما يستوردوا بضاعتهم انهم ينتجوا ويبقا عندنا منتجات وطنيه نفتخر بيها وكمان هنخلوا العملا ليهم في بلدنا يتحملوا نتيجة عملتهم المهببه( وليتحمل كل عميل لهم وشريك نتيجة فعلته السوداء وليقع معهم كما يقعون ) وكمان هنخلوا حكوماتنا البليدة يفكروا يصلحوا من نفسهم ويعملوا خطوط انتاج ويزرعوا ويرجعوا الزراعات تاني اللي أهملوها وموتوها فتسندنا بعيد عن امريكا علشان ما نتحججوش بيها كل شويه .وباااااردوا هتقولوا البت دي ساذجة وعبيطة والله هي الحكاية كده بس انتم اللي مش واخدين بالكم هههههههههههه وفكروا شويه .

طيب سيبوكوا من كل القرف ده خلينا مالناش دعوة بالفلسطينيين الوحشين دول احنا مالنا بيهم ياعم ؟ خلينا نفكروا بشكل أناني ونفكروا بنفسنا وبس وهقوللكم هو انتوا مش عارفين ضرر البيبسي والكولا ومشروبات الصودا دي إيه؟طيب مش عارفين اكلات التيك اواي بالمايونيز والخلطات اللي فيها دي بتعمل ايه؟وإوعوا تصدقوا ان مافيش مايونيز ولا جبن سايحة بتدخل في اي واحدة حتى لو مش باينه ومتنكرة لأن الخطله نفسها اللي بتعمل الشكل المقرمش او اللون بتاع القطع علشان يمسكوه فيها بيبقى بيها قبل القلي.

طب بلاش سيبك سيبك من الكلام الفاضي ده انا هتكلم مع واحده ست أحسن لأن الستات هما اللي بينكدوا علي الرجالة وبيقرفوهم ومن كتر القرف والنكد الراجل مش هيحط حاجه في بقه خاااااااااااااالص ههههههههههههههههه وهقوللها:

ياختي يا حبيبتي البيبسي والكولا ومشروبات الصودا دي بتعمل هشاشة عظام والعياذ بالله وطبعا مش هتحبي الهشاشه لا ليكي ولا لجوزك صح؟ وإلا يعني هتبقى مصيبه صودا ووقعت علي دماغك وليكي لوحدك في الحالتين ههههههههههههههه

ووجبات التيك أواي دي كمان بتعمل كرش ليكي ولجوزك طيب جوزك هنقولوا مش مهم الرجالة بعد الجواز علشان يداروا خيبتهم بيقولوا الراجل ما بيعيبهوش حاجه وبيسيبوا البالونه اللي فـ بطنهم تكبر ولو مش في وظيفة مهمه وليها مركزها في البلد بيسيبوا كمان دقنهم تطول وبيقولوا إحنا تدينا وبقينا تبع السنة والخوان المسلمين ( ودي حجه طبعا إلا لمن اتقى عشان بس ماحدش يزعل مني آه ) وشعرهم مش بيسرحوه بالاسبوع وماااااااااااااااااشي الحال . وتتحرق الست اللي وقع في أرابيز أبوها دي تقوم الصبح تتفاجيء بواحد تاني خاااااااااااااااالص مش مهم قدرها وخليها هي الاحسن.

أما إنت بقا يا حبيبتي لو طلعلك بالونه في بطنك هتبقى طول السنه شكلك حامل وهو هيقطع في فروة أمك ويقول للي رايح وللي جاي قإيه الحل؟ لازم تقعدي تعملي في رياضة لغاية ما حيل اللي جابوا أهلك يتهد ومش دي كمان المشكلة خااااااااااااالص دي حتى الرياضة حلوة وجميلة وبتنسق الجسم وتخليكي مزة . المشكلة بقا لما تتهفي في عقلك وتقولي ابطل الرياضة أو أريح منها شويه هتلاقي البالونه بقت شوال من أول راسك لحد رجلك وده كلام برده؟

وهتكسلي تروحي طبعا كوافير او هتتكسفي اصلا من خلقتك المنفوخة وبالمرة مافيش ميكب ولا الوان بالمره بقا وهيبقى اللون السائد فـ وشك هو الاصفر وبس.

هو طبعا في الاول والاخر وحتى لو كووووووووول ده ما حصلش وراح المحروس جوزك بص لواحده تانيه علي أساس الرفاهيه يعني العادي واللي بيتقال إن العيب فيكي وإنت وبإيدك وبرجلك والحاجات دي كلها المعروفة .

طب بقا لو حصل وبقيتي شوال إيه اللي هيتقال ؟

دول هيحطوا جوزك في قايمة الأولى بالمعروف واللي رايحة واللي جاية هتسيبله حسنة ويا شماتة النسوان إياهم فيكي طيب إيه الحل؟

أعصري علي نفسك كام كيلو لمون وأقفي في المطبخ وأمرك لله وإعملي وجبات ليكي وللمحروس خالية من الدسم والمايونيز والخلطات الحارة إياها وخللي الاكل من بره ده للعزومات بس يعني دبسي فيه المعازيم بس ههههههههههه او للخروجات . يعني لما تخرجي إنت وجوزك وناويين علي غدوه وألا عشوة وبصي كويس اوي في اسم المطعم وإتأكدي انه مش تبع اللي ما يتسموا ولا أي من البلاد المساندة ليهم . ولو جوزك زرجن أو صمم نكدي علي أمه بقا وما يهمكيش خااااااااالص وإرجعوا البيت ده حتى في مثل بيقول( من خرج من داره إتقل مقداره) هههههههههههههههه

لسه برده ما إقتنعتوش بحاجه خااااااااااااااالص ؟

طيب بصوا لصور الأطفال الأبرياء دول يمكن يصعبوا عليكم وعلي فكره كان في مناظر أبشع من كده ياما وأشفقت علي قلوبكم الرحيمه أوي من رؤيتها وياريت انتم كمان يكون عندكم شفقه وتساندوهم وتساندوني في دعوتي وتتضامنوا معايا بس بضمير وتقولوا من قلبكم خلاص حرمنا ومش هنعملوا كده تاني

الصور دي طبعا اكيد شفتوها علي قنوات كتيرة وقطعت قلبكم وقتها بس انا عارفه انكم مظلومين بالنسيان ابن الكلب وبالزهايمر منه لله بقا اللي بيخليكوا تنسوا بسرعة .

بس يا ترى لسة نفسكوا مفتوحة على الوجبات إياها ومش قادرين تستغنوا عنها ؟

على فكرة انا من اكتر الناس اللي بموت في طعم الاكلات دي وكالعادة أصابني اللامبالاة او بمعني اصح زهقت من الدعوى للمقاطعة واصابني اليأس لأني لا اجد الصدى وفضلت لفترة من الزمن آكل وخلاص مع هذه اللامبالاة حتى حدثت لي بعض الرجات التي نحتاجها جميعا وهي من ثلاثة افراد هم :

1- زميلتنا ايناس عندما رأيتها تحكي في بعض ادراجاتها عن نضالها وهي تلميذة في بعض الاعمال التي قامت بها للدعوة للمقاطعة فشعرت انها تخاطبني بشكل غير مباشر لأنها حكت وكأنها تحكي عني ايضا وانا تلميذة عندما كنت اطبع المنشورات والصور وبرده لأخواننا الفلسطينين في عذابهم الدائم ازاحه الله عنهم وقلت في بالي أنني اصبحت أكثر بلادة وأقل كرامه مما كنت عليه وانا تلميذه لا تتجاوز الخامسة عشرة من العمر فقررت أن أعيد الدعوة من جديد ولكني تخازلت فترة ايضا لأني كنت أبحث عن طريقة مختلفه استطيع بها ان ادخل بها قلوبكم وتصدقوني وتتضامنوا مع مشاعر قلبي الحقيقة دون نفاق او مجامله وتقرروا معي السير في طريق المقاطعة

2- عندما دخلت مدونة الزميل هشام النجار ووجدت في إدراجه بعنوان(إخوتي إخواتي هذه دعوة مجانيه لكم جميعا لتقرأوا مقالتي) عندما كان يتحدث هو وزملاءه في المكتب في عمله عن السيارات وأنواعها وكان بينهم مهندس يهودي اسمه داني وعندما تحدث هذا الداني عن السيارات قال: انا لا اقتني مرسيدس ولو كان سعرها منافسا فظنوا انه لا يقتنيها بسبب تراجع مستواها وغلوها ايضا واوصلوا له ظنهم بذلك في المناقشه ولكن فوجئوا بسبب آخر خاااااااااااالص عندما قال السبب وهو : انها المانية وعليها بصمات هتلر وعندما قال له مبتسما ما دخل هتلر في هذا الشأن لقد مات وانتهى واتت اجيال جديدة مطيعة لكم ولا ترفض لإسرائيل طلبا . هذا غير ان الحكومات الالمانيه المتعاقبة منذ انهيار النازيه وحتى عهد قريب كانت تدفع لإسرائيل مئات الملايين من الدولارات سنويا تعويضا لما تسمونه بالمحرقة وعبر لداني هو وزملاءه عن عدم اقتناعهم بالتبرير الذي قاله هذا الداني

فكان رد داني كالآتي: ان بضاعة تبناها المجرم هتلر لسنا بحاجه لها

———

تخيلوا ؟

اليهودي؟

لهذا الحد هم عندهم مبدأ وتصميم وإرادة فعليه ونحن لا ؟

لهذا الحد هم يخافون علي مشاعر بعضهم البعض ونحن لا؟

يا للحقارة والعار الذي لحق بنا وشعرت به وبالخزي بعد قراءة هذا الادراج لزميلنا المهندس هشام النجار وهو يحكي عن هذا الموقف في عمله وهذا ما زادني اصرار وعندا علي الكتابه ولكني ايضا كنت مازلت انتظر الطريقة المناسبة

3- عند رؤيتي لإصرار الزميل ابو الفرقد علي الدعوة بمدونته المصونه بكافة الطرق سواء عن طريق الادراجات او الصفحات التي يضيفها مزوده بالصور والكلمات أوالايميلات التي لا يكل ولا يمل منها يدعو فيها للمقاطعة وعندما دخلت مدونته وتصفحتها وزرت بعض الصفحات غير الادراجات وشاهدت هذه الصور للاطفال وغيرها الكثير المقطعة للقلب فأصبح الجرح لا يحتمل الانتظار .غيري لا يكلوا ولا يملوا فلماذا انا أمل ولا ادعوا إلا كل فتره ويصيبني اليأس أحيانا كثيره واحيانا يصيبني اللامبالاة فقلت هذه المره سوف لا يهمني الطريقه وسوف لا انتظر ان انمق في كلماتي حتى يتقبلها مني الغير سأتكلم معهم بأي طريقة تأتي علي لساني بما في قلبي رغم ان ما في قلبي وجع لا يعلمه سوا الصادقين فقط الذين مازالوا احياء النبض والذي اتمناه فيكم جميعا . فبسرعة بعثت اطلب من زميلي ابو الفرقد ان استعير منه هذه الصور للاطفال وهذه الصور للمنتجات التي اتمنى منكم ان تحفظوا شكلها واسمها جيدا حتى لا تقعوا في الخطيئة وتدفعوا بأيديكم ثمن ما يدمر به اخوانكم وانتم من بعدهم ويبقا كده حققتوا آخر النكته وهي : طيب بودره هتشوفوا ههههههههههه

وهذه المنتجات هي

لا يغرنكم تغيير اسم بوش بأوبامبا كل يأتي لتحقيق سياسة أمريكا المعروفة ولكن لكل طريقته الخاصة وإعلموا ان اسرائيل هي البنت المدللة لأمريكا وإن اعترضت بعقلها يوما لم ولن يكن فلن تستطيع بقلبها عقابها في أي يوم بل ستساندها بآخر دولار بدافع مبدأ (أنا واخويا على ابن عمي وانا وابن عمي علي الغريب)

[img][/img][img][/img][img][/img][center]

Admin عدد المساهمات : 189 تاريخ التسجيل : 16/07/2010

زملائي وزميلاتي في المنتدى وخارجه وكل زائر يشرفه أرجو منكم المقاطعة المقاطعة المقاطعة لكل منتج من المنتجات الامريكيه والمتعاونه معها ومع اسرائيل حتى لا نساهم بأموالنا في تعزيز اقتصادهم وفي سلاح يضرب في وجه اخواننا في فلسطين واي بلد معتدى عليه ومنهوب حقوقه ونحن من بعدهم نتيجة ما نقدمه بأيدينا من دعم لمنتجاتهم

خالص التحايا وكل عام وانتم بألف خير جميعا وكل الامه الاسلاميه والعربيه بمسلميها ومسيحيها يارب